ஒட்டு மொத்த தமிழ் சினிமா ரசிகர்களும் மிகுந்த ஆவலோடு எதிர்பார்த்து காத்திருக்கும் மாமன்னன் திரைப்படத்தின் ரிலீசுக்கு முன்பாக பட குழுவினர் சர்ப்ரைஸாக புது மேக்கிங் வீடியோவை வெளியிட்டுள்ளனர். தனது முந்தைய படங்களான பரியேறும் பெருமாள் மற்றும் கர்ணன் உள்ளிட்ட படங்களால் தமிழ் திரையுலகிலும் ரசிகர்கள் மத்தியிலு மிகப்பெரிய பாதிப்பை ஏற்படுத்திய இயக்குனர் மாரி செல்வராஜ் இயக்கத்தில் அடுத்த தரமான படைப்பாக தயாராகியுள்ள படம் மாமன்னன். மாமன்னன் படம் குறித்த முதல் அறிவிப்பு வந்த சமயத்தில் இருந்து இப்போது வரை நாளுக்கு நாள் அது குறித்த ஆர்வம் ரசிகர்கள் மத்தியில் அதிகம் ஆகிக்கொண்டே இருக்கிறது. தமிழ் சினிமாவில் முன்னணி தயாரிப்பாளராகவும் நடிகராகவும் திகழ்ந்த உதயநிதி ஸ்டாலின், முன்னதாக கடந்த சட்டமன்றத் தேர்தலில் சேப்பாக்கம் தொகுதியில் சட்டமன்ற உறுப்பினராக தேர்ந்தெடுக்கப்பட்டு, தற்போது தமிழ்நாடு இளைஞர் நலன் மற்றும் விளையாட்டு துறை அமைச்சராக பதவி வகித்து வருகிறார். எனவே முழுவதுமாக சினிமாவை விட்டு விலகி முழு நேர மக்கள் பணியில் ஈடுபட முடிவெடுத்துள்ளதால் உதயநிதி ஸ்டாலின் நடிப்பில் கடைசியாக வெளிவர இருக்கும் திரைப்படம் தான்.
மாமன்னன் படத்தில் உதயநிதி ஸ்டாலின் - வைகைப்புயல் வடிவேலு கதையின் நாயகர்களாக நடித்துள்ளனர். வைகைப்புயல் வடிவேலு அவர்களை இதுவரை பார்த்திராத முற்றிலும் மாறுபட்ட புதிய கதாபாத்திரத்தில் இயக்குனர் மாரி செல்வராஜ் மாமன்னன் படத்தில் நடிக்க வைத்திருக்கிறார். வைகைப்புயல் வடிவேலு அவர்களின் உடல் மொழியும் பார்வையும் அற்புதமான நடிப்பும் ரசிகர்களை வெகுவாக கவர்ந்துள்ளது. இந்த கதாப்பாத்திரம் குறித்து பேசியபோது "இது கொஞ்சம் வில்லன் மாதிரியும் இருக்கும்" என வடிவேலு அவர்கள் தெரிவித்து இருப்பதால் இன்னும் எதிர்பார்ப்பு அதிகரித்திருக்கிறது. மேலும் புரட்சிகரமான கதையின் தாக்கியதாக கீர்த்தி சுரேஷும் மிரட்டலான வில்லனாக ஃபகத் ஃபாசில் நடித்துள்ளனர். கடந்த சில தினங்களுக்கு முன்பு வெளிவந்த மாமன்னன் திரைப்படத்தின் மிரட்டலான ட்ரெய்லர் ரசிகர்களிடையே பெரும் வரவேற்பை பெற்றது. உதயநிதி ஸ்டாலின் அவர்கள் தனது திரைப் பயணத்திலேயே தனது சிறந்த நடிப்பை வெளிப்படுத்தி இருக்கிறார் என சொல்லும் அளவிற்கு மிகவும் இயல்பாகவும் ஆக்ரோஷமாகவும் மாமன்னன் திரைப்படத்தில் நடித்திருக்கிறார்.
நீண்ட காலமாக தான் பேச நினைத்த ஒரு சமூக நீதி பிரச்சனையை தரமான அரசியல் படமாக திரை வடிவமாக இயக்குனர் மாரி செல்வராஜ் மாமன்னனை உருவாக்கி இருக்கிறார். தேனி ஈஸ்வர் ஒளிப்பதிவில், செல்வா.RK படத்தொகுப்பு செய்யும் மாமன்னன் திரைப்படத்தை ரெட் ஜெயன்ட் மூவிஸ் நிறுவனம் தயாரித்துள்ளது. இசைப்புயல் ஏ.ஆர்.ரஹ்மான் தனது அட்டகாசமான இசை மழையால் ஏற்கனவே ரசிகர்களை நனைய வைத்திருக்கிறார். தொடர்ந்து அவரது பின்னணி இசைக்காக ரசிகர்கள் ஆவலோடு காத்திருக்கின்றனர். நாளை ஜூன் 29ஆம் தேதி மாமன்னன் படம் உலகெங்கும் திரையரங்குகளில் ரிலீஸாக இருக்கிறது. இந்த நிலையில் ரிலீசுக்கு முன்பாக ரசிகர்களுக்கு சர்ப்ரைஸ் கொடுக்கும் வகையில் படக்குழுவினர் மாமன்னன் படத்தின் மேக்கிங் வீடியோவை வெளியிட்டுள்ளனர். ரசிகர்களின் கவனத்தை வெகுவாக ஈர்த்த அந்த மாமன்னன் பட மேக்கிங் வீடியோவை கீழே உள்ள லிங்கில் காணலாம்.