இந்திய சினிமாவின் பல கோடி சினிமா ரசிகர்களின் ஃபேவரட் கதாநாயகர்களில் ஒருவராக வலம் வரும் நடிகர் அஜித்குமார் நடிப்பில் கடைசியாக வெளிவந்த திரைப்படம் வலிமை. அதிரடி ஆக்சன் காட்சிகள் நிறைந்த திரைப்படமாக வெளிவந்த வலிமை ரசிகர்களுடைய நல்ல வரவேற்பை பெற்று சூப்பர் ஹிட் ஆனது. அடுத்ததாக  இயக்குனர் விக்னேஷ் சிவன் இயக்கத்தில் தனது 62வது படமாக தயாராகவுள்ள AK62 திரைப்படத்தில் அஜித் நடிக்கவுள்ளார்.

இதனிடையே இயக்குனர் H.வினோத் இயக்கத்தில் அஜித்குமார் நடித்துள்ள திரைப்படம் துணிவு. நேர்கொண்ட பார்வை மற்றும் வலிமை ஆகிய திரைப்படங்களைத் தொடர்ந்து மீண்டும் போனி கபூர் தயாரிப்பில் இயக்குனர் H.வினோத் இயக்கத்தில் நீரவ் ஷா ஒளிப்பதிவில் அஜித்குமார் நடித்திருக்கும் துணிவு திரைப்படத்திற்கு விஜய் வேலுகுட்டி படத்தொகுப்பு செய்ய, ஜிப்ரான் இசையமைக்கிறார்.

அஜித் குமாருடன் இணைந்து மஞ்சு வாரியர் கதாநாயகியாக நடிக்க சமுத்திரக்கனி, ராஜதந்திரம் வீரா, சிபி புவனச்சந்திரன், பிக் பாஸ் அமீர், பாவணி, மமதி சாரி ஆகியோர் முக்கிய வேடங்களில் நடித்துள்ள துணிவு திரைப்படம் அடுத்த ஆண்டு ஜனவரியில் பொங்கல் வெளியீடாக ரிலீஸாகவுள்ளது. அதே சமயத்தில் தளபதி விஜயின் வாரிசு திரைப்படமும் துணிவு திரைப்படத்தோடு ரிலீஸாக இருப்பதால் இந்த இரண்டு திரைப்படங்களையும் ரசிகர்கள் ஆவலோடு எதிர்பார்த்து காத்திருக்கின்றனர்.

இந்நிலையில் துணிவு படத்தில் முக்கிய வேடத்தில் நடித்திருக்கும் நடிகை மமதி சாரி நமது கலாட்டா சேனலுக்கு கொடுத்த பிரத்தியேக பேட்டியில், துணிவு திரைப்படத்தில் கதையை முன்னெடுத்துச் செல்லும் மிக முக்கியமான ஒரு கதாபாத்திரத்தில் தான் நடித்திருப்பதாக தெரிவித்துள்ளார். துணிவு திரைப்படத்தில் தனது கதாபாத்திரம் குறித்தும் அஜித்குமார் மற்றும் துணிவு திரைப்படம் குறித்தும் பல சுவாரஸ்யமான தகவல்களை பகிர்ந்துள்ளார்.மமதி சாரி பேசிய முழு பேட்டியை கீழே உள்ள லிங்கில் காணலாம்.